Gweithiwr Prosiect Cyswllt Mabwysiadu Modern

Am Y Gwasanaeth

Mae Gwasanaeth Mabwysiadu Cenedlaethol Cymru yn cydweithio i ddarparu gwasanaethau mabwysiadu ledled Cymru. Mae’n dod â gwasanaethau mabwysiadu awdurdod lleol at ei gilydd mewn pum cydweithfa ranbarthol a gydlynir ac a arweinir gan dîm canolog bach a Chyfarwyddwr Gweithrediadau. Mae Asiantaethau Mabwysiadu Gwirfoddol sy’n gweithredu yng Nghymru yn bartneriaid pwysig yn y gydweithfa yn ogystal ag asiantaethau eraill megis iechyd ac addysg.

Cyflogir staff y tîm canolog gan Gyngor Caerdydd.

Am Y Swydd

Mae cyfle cyffrous wedi codi i arwain y gwaith o ddatblygu a gweithredu dull i blant sy'n cael eu mabwysiadu gysylltu â'u teuluoedd biolegol a phobl arwyddocaol eraill. Mae'r gwaith hwn wedi'i ffurfio mewn cydweithrediad â'r holl sefydliadau o fewn y Gwasanaeth Mabwysiadu Cenedlaethol (GMC) ac mae'n seiliedig ar gyd-destun deddfwriaethol Cymru. Bydd yn apelio'n arbennig at ymarferwyr sydd â phrofiad o gynllunio, cefnogi ac adolygu trefniadau mabwysiadu a chysylltu, yn ogystal â'r rhai sydd wedi cyfrannu at waith datblygu cysylltiedig.

Wedi'i wreiddio yn yr egwyddor bod cynnal perthnasoedd ac ymdeimlad o hunaniaeth yn hanfodol i bob plentyn sydd wedi’i fabwysiadu, rydym yn awyddus i annog arloesedd a chreadigrwydd i sicrhau bod trefniadau cyswllt yn parhau i ganolbwyntio ar y plentyn ac yn ymatebol i anghenion unigol. Fel rhan o'r gwaith o foderneiddio parhaus y gwasanaethau mabwysiadu yng Nghymru—a chyda nifer cynyddol o blant â chynlluniau ar gyfer cyswllt uniongyrchol—mae hwn yn gyfnod hollbwysig i wasanaethau mabwysiadu a phlant. Mae angen cryfhau a datblygu cefnogaeth i'r trefniadau hyn wrth i blant dyfu ac wrth i'w hanghenion esblygu.

Rydym yn chwilio am geisiadau gan ymarferwyr profiadol sydd â dealltwriaeth gref o wasanaethau mabwysiadu a chynllunio gofal, ac sy'n gallu meithrin perthnasoedd gwaith effeithiol gydag ystod eang o weithwyr proffesiynol ac asiantaethau. Yn gysylltiedig â Thîm Canolog y GMC yng Nghaerdydd, ond yn gweithio ledled Cymru gyda thimau rhanbarthol, awdurdodau lleol ac asiantaethau mabwysiadu gwirfoddol, bydd y deiliad swydd llwyddiannus yn chwarae rôl allweddol wrth helpu i weithredu trefniadau newydd a pharhaus yn rhanbarthol.

Beth Rydym Ei Eisiau Gennych

Bydd y swydd ran-amser a thros dro hon, am 24 mis, yn darparu dilyniant/cyfle gyrfa cyffrous i uwch ymarferydd arwain a datblygu cyswllt i blant sy'n cael eu mabwysiadu ledled Cymru. Byddwch wedi'ch lleoli o fewn y Tîm Canolog a byddwch yn gweithio'n agos gyda'r Rheolwr Datblygu Cymorth Mabwysiadu a'r Pennaeth Polisi, Ymarfer a Chyfathrebu. Gellir ystyried secondiad i ymgeisydd llwyddiannus sy'n gweithio ar hyn o bryd o fewn awdurdodau lleol/rhanbarthau mabwysiadu Cymru a sefydliadau eraill sy'n rhan o gydweithrediaeth y GMC.