Prin yw'r rolau sy'n cynnig y cyfle i wneud gwahaniaeth mor ddwys i fywydau plant, pobl ifanc a theuluoedd. Ym Mhen-y-bont ar Ogwr, rydym yn ymrwymedig i sicrhau bod pob plentyn yn cael y dechrau gorau posibl mewn bywyd, yn ddiogel rhag niwed ac yn cael ei gefnogi i gyflawni ei botensial llawn. Mae ein dull wedi'i wreiddio mewn ymyrraeth gynnar, atal, ymarfer sy'n seiliedig ar gryfderau a gweithio ochr yn ochr â theuluoedd i feithrin gwydnwch a chynnal canlyniadau cadarnhaol.
Rydym yn falch o'n gweithlu Gwasanaethau Plant a Theuluoedd, sy'n gweithio i ddiogelu a chefnogi plant, pobl ifanc a theuluoedd ar draws y fwrdeistref sirol. Rydym yn wasanaeth plant a theuluoedd sy'n cael cefnogaeth dda ac sy'n perfformio'n dda ac rydym mewn sefyllfa dda i barhau i wella, ac mae hyn wedi'i gydnabod gan Arolygiaeth Gofal Cymru: 'Mae arweinwyr Cyngor Bwrdeistref Sirol Pen-y-bont ar Ogwr (y Cyngor) wedi blaenoriaethu gwasanaethau plant yn gyson er mwyn cefnogi gwelliannau parhaus ac amserol. Mae hyn wedi gwella ansawdd a chyflawniad swyddogaethau gwasanaethau cymdeithasol yn sylweddol'.
Fel Cyngor, rydym yn benderfynol o ddiogelu plant agored i niwed, cefnogi teuluoedd a chymunedau cryf a darparu gwasanaethau rhagorol sy'n gwella canlyniadau a chyfleoedd bywyd. A chithau'n Bennaeth Gwasanaethau Plant a Theuluoedd newydd i ni, byddwch yn aelod allweddol o'r tîm arwain, gan weithio'n agos gyda chydweithwyr ar draws y Cyngor a chyda phartneriaid ym maes addysg, iechyd, yr heddlu, y trydydd sector, a sefydliadau rhanbarthol a chenedlaethol.
Byddwch yn darparu arweinyddiaeth strategol i ofal cymdeithasol plant a gwasanaethau cymorth i deuluoedd, gan ysgogi'r gwaith o gyflawni ein blaenoriaethau a sicrhau gwelliant parhaus mewn atal ac ymyrraeth gynnar, diogelu, cynllunio gofal, perfformiad a chanlyniadau. Mae'r rôl hon yn gofyn am arweinydd proffesiynol profiadol sydd â'r gallu i ysbrydoli ein gweithlu, cynnal ymarfer o ansawdd uchel sy'n seiliedig ar gryfderau, ysgogi arloesedd a thrawsnewid a darparu gwasanaethau rhagorol.
Byddwch yn dod â dull cryf sy'n seiliedig ar werthoedd, hanes o gyflawni gwelliant cynaliadwy ac ymrwymiad i roi plant a theuluoedd wrth wraidd y broses o wneud penderfyniadau. Byddwch yn fedrus iawn wrth arwain gweithlu amrywiol ac amlbroffesiynol, gan adeiladu partneriaethau effeithiol ac arwain cydweithredu ar draws systemau er mwyn ymateb i anghenion plant, pobl ifanc a theuluoedd.
Mae Pen-y-bont ar Ogwr yn cynnig llwyfan cryf i adeiladu arno. Mae gennym weithlu talentog ac ymroddedig, aelodau etholedig cefnogol, partneriaethau cryf a phenderfyniad i wella canlyniadau i blant a phobl ifanc yn barhaus.
Rhaid i chi allu dangos dealltwriaeth drylwyr o'r dirwedd ddeddfwriaethol, polisi ac ymarfer sy'n effeithio ar wasanaethau plant a theuluoedd. Byddwch yn weithiwr cymdeithasol proffesiynol gyda gwerthfawrogiad dwfn o'r cyfleoedd a'r heriau sy'n wynebu gwasanaethau plant a theuluoedd a gweledigaeth glir ar gyfer sut y gall cymorth cynnar, atal, cymorth i deuluoedd ac ymyrraeth statudol effeithiol weithio gyda’i gilydd i wella canlyniadau.
Rydym eisiau clywed gan unigolion sydd â hanes o ymarfer sy'n seiliedig ar gryfderau, cryfhau rhwydweithiau teuluol o fewn cymunedau, lleihau'r angen am ymyrraeth statudol lle bynnag y bo'n bosibl, gwella profiadau plant mewn gofal a'r rhai sy'n gadael gofal, a sicrhau bod pob plentyn a pherson ifanc ym Mhen-y-bont ar Ogwr yn cael ei gefnogi i ffynnu. Drwy eich arweinyddiaeth strategol, byddwch yn ysgogi rhagoriaeth mewn ymarfer, yn meithrin diwylliant o ddysgu a gwella parhaus, ac yn arwain partneriaethau effeithiol sy'n cyflawni newid ystyrlon a pharhaol i blant, pobl ifanc a theuluoedd.
Cliciwch yma i wneud cais nawr
