RHEOLWR CYMORTH BUSNES

Am Y Gwasanaeth

Mae cyfle cyffrous wedi codi ar gyfer unigolyn ymrwymedig â sgiliau cyfathrebu a rhyngbersonol gwych i ymuno â’r Tîm Gwasanaethau Cyllid yn Oedolion, Tai a Chymunedau.

Am Y Swydd

Bydd y rôl wedi'i lleoli o fewn Tîm Cyllid Gwasanaethau Oedolion, sy'n rhan o'r Gwasanaethau Cyllid, gan weithio'n agos gyda phob rhan o'r tîm cyllid. Bydd hyn yn cynnwys y Tîm Gofal Preswyl a Nyrsio, y Tîm Gofal Cartref, y Tîm Anfonebau, y Tîm Asesu Ariannol, y Tîm Taliadau Uniongyrchol, a'r Timau Broceriaeth. Rydym yn gyfrifol am drefnu pecynnau gofal ar gyfer Gofal Cartref a Gofal Preswyl a Nyrsio, ac rydym yn talu'r holl ddarparwyr gofal sy'n darparu gwasanaethau ar ein rhan. Rydym hefyd yn llunio ac yn rheoli contractau gyda'r darparwyr hyn. Yn ogystal, rydym yn codi tâl ar ddefnyddwyr gwasanaeth am eu cyfraniad tuag at gostau gofal, sy'n cynnwys cynnal asesiad ariannol yn seiliedig ar eu modd. Mae hwn yn dîm prysur, ac felly bydd angen i chi feddu ar sgiliau cyfathrebu rhagorol ynghyd â sgiliau dadansoddol cryf. Bydd disgwyl i chi gydweithio, cyfathrebu, cynorthwyo a chefnogi holl reolwyr a staff y tîm, yn ogystal â darparu cymorth i'r Rheolwr Cyllid.

Ar hyn o bryd, rydym yn gweithredu model gweithio hybrid o Neuadd y Sir ym Mae Caerdydd. Fel arfer, byddwn yn gweithio yn y swyddfa am un neu ddau ddiwrnod yr wythnos, gyda gweddill yr wythnos yn cael ei dreulio'n gweithio gartref. Mae gennym ddull hyblyg o weithio, felly gall y trefniadau amrywio o wythnos i wythnos.

Swydd dros dro yw hon tan 31/07/2027

Rhaid i ymgeiswyr mewnol sy'n dymuno gwneud cais am y swydd hon ar sail secondiad gael cymeradwyaeth cyn gwneud cais gan ddefnyddio Ffurflen SEC1 (4.C.081).  Dim ond y Cyfarwyddwr / Cyfarwyddwr Cynorthwyol / Prif Swyddog neu uwch swyddog enwebedig ar radd nad yw’n is na RhG2, neu yn achos staff mewn ysgolion, y Pennaeth / Corff Llywodraethu, all gymeradwyo ceisiadau.

Beth Rydym Ei Eisiau Gennych

Bydd gennych rôl bwysig yn cydlynu a datblygu’r tîm cyllid yn ystod cyfnod o newid strategol sylweddol, felly mae’r gallu i reoli newid mewn modd cadarnhaol a bod yn hyblyg yn nodweddion hanfodol ar gyfer y swydd hon. Mae’n rhaid i chi fod wedi gweithio ym maes cymorth busnes am 2 flynedd, wedi gweithio mewn swydd oruchwylio am flwyddyn a meddu ar brofiad gwaith cyllid a rheoli staff. Byddwch yn gallu cynhyrchu deunydd ysgrifenedig eglur ac yn gallu cyfathrebu ar lafar yn effeithiol, bydd gennych brofiad a dealltwriaeth o systemau gwybodaeth ac o ddefnyddio Technoleg Gwybodaeth mewn swyddfa. Byddwch yn arddangos gallu i ddatrys problemau ac yn ymrwymedig i anghenion y cwsmer. Mae’n hanfodol eich bod yn gallu dangos dealltwriaeth dda o hyrwyddo gwaith tîm effeithiol; rheoli ac annog staff; gwaith grŵp; gwasanaeth o ansawdd; ac arferion recriwtio, dewis a sefydlu.