Gweithiwr Chwarae

Drwy weithio mewn tîm, byddwch yn helpu i greu awyrgylch chwarae diogel, croesawgar a chynhwysol i blant a phobl ifanc rhwng tair a 14 oed.

Byddwch yn annog plant i ddefnyddio eu dychymyg a rhoi cyfleoedd iddyn nhw greu mannau newydd a gwahanol ar gyfer chwarae; lleoedd mawr a bach, y tu mewn a’r tu allan, sy’n ddeniadol ac sy’n cynnig rhyddid i chwarae mewn awyrgylch diogel.

Gallwch hefyd symud ymlaen i fod yn Uwch Weithiwr Chwarae, a gallai’r cyfrifoldebau ychwanegol hynny gynnwys y canlynol:

• goruchwylio gwirfoddolwyr a gweithwyr chwarae
• ymdrin â chyllidebau
• cynrychioli’r lleoliad mewn cyfarfodydd gyda gweithwyr proffesiynol eraill.

Gall eich lleoliad gwaith gynnwys amrywiaeth eang o leoliadau, fel y canlynol:

• gofal plant y tu allan i’r ysgol
• meysydd chwarae antur gyda staff
• prosiectau gwaith chwarae teithiol
• cynlluniau chwarae yn ystod y gwyliau.

Byddwch yn gweithio mewn tîm, yn cysylltu â rhieni ac eirioli dros hawliau plant i chwarae yn eu cymunedau. Mae hyn yn golygu arsylwi a chofnodi datblygiad plant, a chynllunio gweithgareddau i gefnogi eu dysgu a’u datblygiad parhaus.

I lwyddo yn y rôl hon, bydd angen y canlynol arnoch chi:

• natur ofalgar ac amyneddgar
• bod yn frwdfrydig, yn greadigol, ac ystyried syniadau newydd
• sgiliau cyfathrebu effeithiol, gan gynnwys sgiliau llafar a gwrando
• hyder wrth ddelio â phlant ac oedolion
• creu cyfleoedd newydd i chwarae
• gallu addasu i sefyllfaoedd sy’n newid
• annog annibyniaeth plant
• gallu asesu’r risgiau dan sylw ac ymyrryd lle bo angen.

Mae’r Egwyddorion Gwaith Chwarae yn helpu i egluro’r rolau a’r cyfrifoldebau.

Gallwch ddod o hyd i’r cymwysterau sydd eu hangen neu’r cymwysterau a argymhellir ar gyfer y rôl hon gyda Chwarae Cymru.

Efallai yr hoffech ystyried y rhaglen Cyflwyniad i ofal plant sy'n cwmpasu'r hanfodion sydd eu hangen arnoch i ddechrau gweithio ym maes gofal plant.

I gael gwybod am gyfleoedd hyfforddi ychwanegol mewn gwaith chwarae, cysylltwch â Chwarae Cymru a Clybiau Plant Cymru Kids Clybs.