O'r ddesg swyddfa i'r blynyddoedd cynnar: stori Allan
Mae ymarferwyr gwrywaidd yn ffurfio canran fach o'r gweithlu blynyddoedd cynnar ledled Cymru, ond mae eu heffaith ar ddatblygiad cymdeithasol ac emosiynol plant yn ddwfn.
Gan weithio ochr yn ochr â rheolwr y feithrinfa, Tracey, ym Meithrinfa Gofal Dydd Hollies yng Nghaerdydd, mae Allan wedi dod ag egni, sicrwydd a deinameg newydd i'r lleoliad.
Ar ôl degawd yn gweithio ym maes cwynion ariannol, roedd Allan yn barod am newid. Agorodd gyfle am rôl gyflenwi yn The Hollies, ac felly agorodd y drws i yrfa nad oedd erioed wedi'i hystyried. Dair blynedd a hanner yn ddiweddarach, mae'n ymarferydd cymwys ac yn rhan hanfodol o'r tîm meithrin.
Yma, mae Allan yn myfyrio ar ei daith, llawenydd dyddiol byd addysg y blynyddoedd cynnar, a pham mae cysylltiad gwirioneddol yn bwysig i’r eithaf.
Beth wnaeth eich arwain i wneud y naid o weithio mewn swyddfa i ofal plant?
Treuliais tua deng mlynedd yn gweithio mewn swyddfa yn delio â chwynion PPI cyn ffansïo newid. I ddechrau, rhoddais gynnig ar ofal preswyl i oedolion am chwe mis ond doeddwn i ddim yn ffansi. Rwy'n berson eithaf llyfrol, felly roeddwn i'n meddwl y gallai addysgu fod yn syniad da ac ymunais ag asiantaeth er mwyn chwilio am rolau cynorthwyydd addysgu.
Ar hap, rhoddodd yr asiantaeth shifftiau meithrin i mi yn Hollies a syrthiais mewn cariad a’r swydd yn gyflym iawn. Damwain oedd, mewn gwirionedd, gan nad oeddwn erioed wedi bwriadu gweithio gyda phlant mor ifanc. Nid oedd erioed wedi fy nharo fel syniad.
Beth sydd fwyaf gwerth chweil am eich rôl o ddydd i ddydd?
Mae'n ymwneud â'r plant. Mae adeiladu perthynas â nhw, eu gwylio yn tyfu, a bod yn ffynhonnell ddibynadwy o gynhesrwydd, cysur a diogelwch yn fraint go iawn.
Mae gan blant ifanc eu bywydau mewnol cyfoethog eu hunain a phersonoliaethau gwahanol. Er mai ein cyfrifoldeb proffesiynol yw gofalu am a llywio’u datblygiad, rydyn ni hefyd yn dysgu cymaint ganddynt. Mae eu llawenydd diymdrech, eu rhesymu rhyfedd, maddeuant, a chreadigrwydd yn fy ngalluogi bob dydd.
A wnaethoch chi wynebu unrhyw bryderon neu oedi ynglŷn â mynd i mewn i sector sy’n bennaf yn fenywaidd?
Yn onest, nid o'r tîm. Mae'r staff a'r rheolwyr yn Hollies wedi bod yn gefnogol ac yn werthfawrogol o'r diwrnod cyntaf. Pan fyddaf yn dweud wrth bobl fy mod i'n gweithio mewn meithrinfa, mae ymatebion bron bob amser yn gadarnhaol.
Daeth unrhyw oedi o fy mhryderon fy hun ynghylch canfyddiadau o ddyn sy'n darparu gofal agos. Rwy'n gwybod bod gan rai pobl bryderon, ac nid wyf byth eisiau diystyru neu fychanu hynny. Ond mae safonau clir, cyfathrebu agored, ac ymarfer proffesiynol yn gyflym yn rhoi'r pryderon hynny i orffwys.
Sut ydych chi'n teimlo bod eich presenoldeb yn gwneud gwahaniaeth i'r plant?
Rwy'n cael fy hun yn llenwi cilfach yn naturiol. Yn yr awyr agored, fi yw'r un egnïol, yn mynd ar drywydd y plant o gwmpas yn esgus bod yn ddeinosor neu'n grocodeil ac yn rasio. Fi hefyd yw'r 'bug man', yn chwilio'r ardd am bryfed ac yn dangos pryfed cop y gallai rhai o'r tîm eu hosgoi i'r plant.
Mewn byd lle mae enghreifftiau cadarnhaol o wrywdod mor hanfodol, mae rhoi cyswllt bob dydd i blant â model rôl gwrywaidd sy'n gwrando, yn gofalu ac yn rhoi sicrwydd yn hynod werthfawr.
Ym mha ffyrdd mae eich rôl yn ymestyn i gefnogi rhieni a'r gymuned ehangach?
Mae darparu gwasanaeth dibynadwy yn hanfodol i deuluoedd sy'n gweithio, ond mae ein cefnogaeth yn llawer dyfnach. Rydyn ni’n monitro cerrig milltir datblygiadol, yn nodi unrhyw bryderon iechyd neu ddiogelu sy'n dod i'r amlwg yn gynnar ac yn gweithredu fel eiriolwyr i blant sydd angen help ychwanegol. Rydyn ni hefyd yn cysylltu'n uniongyrchol ag arbenigwyr allanol i sicrhau bod plant a'u teuluoedd yn cael y gefnogaeth gywir cyn gynted â phosibl.
Beth fyddech chi'n ei ddweud wrth ddynion eraill a allai fod yn amheus ynglŷn â gweithio ym maes gofal plant?
Mae'n debyg i sut mae dawnsio yn dod yn naturiol pan ddaw cerddoriaeth dda ymlaen. Doeddwn i erioed yn gwybod y byddwn i'n dda amdano. Ar fy shifft gyntaf, roeddwn i'n teimlo'n eithaf swil, ond cyn gynted ag es i mewn i'r ystafell a chrymio i lawr i lefel y plant, rhuthrodd pawb drosodd i chwarae.
Mae plant yn bobl fach wych, ysbrydoledig. Os ydych chi'n ei ystyried, neidiwch yn syth i mewn a gweld sut mae'n mynd. Byddwch chi'n gwybod yn weddol gyflym a yw’r swydd yn eich siwtio ai peidio. Os ydyw, efallai y bydd yn newid eich bywyd er gwell. Mae'n beth hyfryd mynd adref a gwybod yn eich esgyrn eich bod wedi dod â chysur, chwerthin a chynhesrwydd i ddiwrnod plentyn... ac maen nhw'n sicr yn rhoi hynny'n ôl i ni hefyd.
Os ydych chi eisiau gyrfa lle mae eich ymdrech ddyddiol yn cyfoethogi bywyd person arall yn uniongyrchol, mae gofal blynyddoedd cynnar yn cynnig ymdeimlad o bwrpas na all rôl swyddfa gyffredin ei gyfateb.
