Swyddog Ymgysylltu ac Asesu

Gan weithredu yn unol â Deddf Plant 1989 a Deddf Gwasanaethau Cymdeithasol a Llesiant (Cymru) 2014, mae'r Gwasanaeth Teuluoedd Cydnerth wedi ymrwymo i sicrhau darpariaeth mentrau Carfan o amgylch y Teulu (TAF) yn effeithiol ledled y Fwrdeistref Sirol.

Yn rhan o'r Gwasanaeth Teuluoedd Cydnerth, mae'r Garfan Asesu, Broceriaeth ac Adolygu yn gyfrifol am ddarparu ymatebion cyflym i atgyfeiriadau, gan sicrhau ei bod yn ymgysylltu â theuluoedd mewn modd cadarnhaol. Mae'r garfan yn cynnal asesiadau cymesur, yn seiliedig ar gydnerthedd, ac yn datblygu cynlluniau cymorth wedi'u teilwra gan ddefnyddio ystod o ymyraethau sydd ar gael. Yn ogystal â hyn, mae'r garfan yn goruchwylio darpariaeth gwasanaethau cymorth o ansawdd uchel gan ystod o ddarparwyr.

Rydyn ni'n bwriadu penodi Swyddog Ymgysylltu ac Asesu Dros Dro Llawn Amser yn rhan o'r Garfan Asesu, Broceriaeth ac Adolygu (GORLLEWIN). Bydd yr ymgeisydd llwyddiannus yn gyfrifol am gyflawni asesiadau gyda theuluoedd ledled Rhondda Cynon Taf, a rhaid iddo feddu ar brofiad ardystiedig o gynnal asesiadau gyda phlant a theuluoedd.

Dylai ymgeiswyr feddu ar gymhwyster Plant a Phobl Ifainc ym maes Iechyd a Gofal Cymdeithasol (FfCCh, sef y Fframwaith Cymwysterau a Chredydau) neu gymhwyster NVQ Lefel 3 yn y maes Gofalu am Blant a Phobl Ifainc neu arddangos y gallu i ennill cymhwyster FfCCh ymhen dwy flynedd o fod yn asesydd.

Am ragor o wybodaeth, ffoniwch Joanne Lewis neu Lisa Lewis ar (01443) 281435.

Mae diogelu plant ac oedolion agored i niwed yn gyfrifoldeb craidd pob un o'r gweithwyr sy'n cael eu penodi gan y Cyngor.

Yn ogystal â'r cyfrifoldeb yma mewn perthynas â diogelu, bydd y Gwasanaeth Datgelu a Gwahardd hefyd yn ymchwilio’n fanwl i gefndir yr ymgeisydd llwyddiannus.

Mae'r Cyngor yn cydnabod gwerth amrywiaeth ei weithlu. Rydyn ni wedi ymrwymo i sicrhau nad yw unrhyw ymgeisydd yn destun gwahaniaethu yn ystod y broses denu a dethol ar sail ei oedran, rhyw, hil, anabledd, cyfeiriadedd rhywiol, hunaniaeth rhywedd, gan gynnwys y rheiny a chanddyn nhw hunaniaeth anneuaidd, crefydd neu gred neu feichiogrwydd neu famolaeth. Mae gyda ni nifer o rwydweithiau staff gan gynnwys Rhwydwaith y Cynghreiriaid, Rhwydwaith Anabledd a Chynhalwyr, a 'Perthyn', ein rhwydwaith LHDTC+.

Fydd ceisiadau sy'n cael eu cyflwyno yn Gymraeg ddim yn cael eu trin yn llai ffafriol na cheisiadau sy'n cael eu cyflwyno yn Saesneg.

Yn rhan o'i amcanion hirdymor mewn perthynas âr Gymraeg a Strategaeth Cynllunio'r Gweithlu, mae'r Cyngor wedi ymrwymo i gynllun cyfweliad gwarantedig ar gyfer siaradwyr Cymraeg Lefel 3 ac uwch. Os ydych chi'n bodloni'r meini prawf hanfodol sydd wedi'u nodi yn y fanyleb person ar gyfer y swydd ac yn siaradwr Cymraeg Lefel 3 ac uwch, bydd gwahoddiad i gyfweliad i chi os byddwch chi'n dewis cymryd rhan yn y cynllun.

Oherwydd y nifer sylweddol o Ffurflenni Cais sy'n cael eu cyflwyno ar hyn o bryd, does dim modd cydnabod ceisiadau unigol. Felly, os dydych chi ddim wedi clywed wrthon ni cyn pen pedair wythnos o'r dyddiad cau, cymerwch fod eich cais wedi bod yn aflwyddiannus y tro yma.  Diolch am eich diddordeb ac am gyflwyno cais am swydd gyda'r Cyngor.

Er mwyn cefnogi addewid gwirfoddol y Cyngor i gefnogi'r Lluoedd Arfog, rhaid i’r sawl sy'n penodi sicrhau bod ymgeiswyr sydd wedi datgan eu bod nhw'n aelodau o’r Lluoedd Arfog, gan gynnwys y rheiny sydd wedi gadael y lluoedd, cyn-filwyr neu filwyr wrth gefn sy’n cwrdd âr meini prawf hanfodol yn y fanyleb person, yn cael cynnig cyfweliad.