Cydlynydd Gofal Cartref

Byddwch yn cynllunio ac yn dyrannu ymweliadau cartref i Weithiwr Gofal Cartref / Uwch Weithiwr Gofal Cartref priodol, gan wneud yn siŵr bod sgiliau a nodweddion y gweithiwr yn cyfateb yn agos i rai'r unigolyn. Byddwch hefyd yn ymateb i newidiadau byr rybudd i gynlluniau a rotas, gan wneud yn siŵr bod pawb y mae hyn yn effeithio arnynt yn cael y wybodaeth ddiweddaraf.

Byddwch yn gwneud yn siŵr bod rotas ac amserlenni gwaith yn cael eu trefnu a'u cynllunio i roi digon o amser i staff ymweld â phobl, a theithio rhwng gwahanol gartrefi. Byddwch yn cysylltu ag aelodau teulu a gweithwyr proffesiynol eraill.

Byddwch yn gyfrifol am gadw cofnodion cywir, gan ddangos trefn a sylw trylwyr i fanylion. Gallwch hefyd symud ymlaen i rolau uwch fel Rheolwr neu Ddirprwy Reolwr Gofal Cartref.

Mae’r gwasanaethau hyn yn darparu gofal a chymorth hanfodol i oedolion a phlant sy’n byw yn eu cartrefi eu hunain.

Mae gan Gofal Cymdeithasol Cymru ragor o wybodaeth am y cymwysterau sy’n ofynnol ar gyfer y swydd hon.

Bydd angen i chi hefyd fod wedi cofrestru gyda Gofal Cymdeithasol Cymru. Gallwch chi wneud cais i gofrestru neu chwilio drwy'r gofrestr ar-lein.

I lwyddo yn y rôl hon, bydd angen y canlynol arnoch chi:

• y gallu i dalu sylw trylwyr i fanylion
• sgiliau cyfathrebu da
• empathi a thosturi
• y gallu i feithrin perthnasoedd ymddiriedus
• y gallu i weithio’n dda mewn tîm
• sgiliau trefnu da
• hyblygrwydd
• y gallu i gadw cofnodion cywir
• gwytnwch
• y gallu i addasu i sefyllfaoedd heriol a newidiol
• agwedd agored a chynhwysol
• y gallu i roi cyfarwyddiadau i aelodau eraill o'r tîm