Karolina, Rheolwr Gofal Preswyl i Blant

Dechreuodd fy nhaith broffesiynol yng Ngwlad Pwyl gyda dyhead i fod yn Swyddog Heddlu. Yn anffodus, methais yr archwiliad meddygol oherwydd safon golwg fy llygaid, a olygodd na allwn ddilyn y llwybr hwnnw.

Roeddwn yn siomedig, ond ni ildiais. Yn lle hynny, dewisais i astudio Gweinyddu Busnes, a oedd o gymorth i mi i ddatblygu gwytnwch ac i ddysgu sut i addasu - rhinweddau a fyddai'n ddiweddarach yn hanfodol yn fy ngyrfa.

Wrth i mi orffen yn y brifysgol, penderfynais deithio ac ymweld â fy chwaer a oedd yn byw yng Nghymru. Newidiodd yr ymweliad hwnnw bopeth. Cefais fy syfrdanu gan y tirwedd, gan gynhesrwydd y bobl, a chyfoeth diwylliant Cymru. Teimlais gysylltiad cryf â'r wlad a phenderfynais aros. Cefais swydd mewn cartref gofal lleol yn Llanymddyfri, ac mewn gwirionedd, dyna lle dechreuodd fy nhaith i ofal cymdeithasol.

Ar ôl dechrau gweithio mewn gofal, roeddwn yn deall pwysigrwydd diwylliant Cymreig, yn enwedig o ran sut rydym yn cefnogi pobl. Roeddwn i eisiau dangos parch ac am integreiddio'n llawn, felly dechreuais ddysgu'r Gymraeg. Roedd yn ymrwymiad personol i anrhydeddu'r gwerthoedd a'r traddodiadau sy’n hanfodol i fywyd Cymreig.

Syrthiais mewn cariad â'r proffesiwn gofal yn gyflym. Dros y blynyddoedd, rydw i wedi gweithio mewn gwahanol feysydd gofal cymdeithasol, gan gynnwys gwasanaethau iechyd meddwl a chefnogaeth i unigolion ag anableddau dysgu. Mae'r profiadau hyn wedi fy helpu i sylweddoli mai dyma le rwy’n ffynnu - yn broffesiynol ac yn bersonol.

Heddiw, rwy'n gweithio fel Rheolwr Gofal Preswyl i Blant mewn cartref plant preswyl sydd â dwy ystafell wely, ac yn cefnogi pobl ifanc rhwng 8 a 18 oed sy'n destun gorchmynion gofal. Mae'r rôl hon wedi fy herio i ddysgu a rhoi deddfwriaeth, polisïau a gweithdrefnau diogelu arbenigol sy'n wahanol iawn i'r rhai mewn gofal oedolion ar waith. Rwyf wedi datblygu dealltwriaeth ddofn o hawliau plant a phobl ifanc, ac rwy'n angerddol am ddefnyddio dull sy'n canolbwyntio ar yr unigolion i gefnogi eu haddysg, eu hiechyd, eu lles emosiynol, a’u cynlluniau i'r dyfodol.

Os ydych chi'n meddwl am weithio ym maes gofal cymdeithasol neu eisiau datblygu eich practis, dyma fy nghyngor i:

• Deallwch y Fframwaith: Cymerwch amser i ddysgu'r ddeddfwriaeth, y polisi a'r protocolau diogelu perthnasol.
• Arhoswch yn wybodus: Cadwch eich ymarfer yn gyfredol trwy hyfforddiant, myfyrio a dysgu parhaus.
• Cefnogwch eich tîm: Adeiladwch ddiwylliant tîm cryf trwy gynnal sesiynnau ddadfriffio, drwy gynnig cefnogaeth emosiynol, a drwy annog cyfathrebu agored.

Yn fy mhrofiad i, mae'r rhinweddau canlynol yn hanfodol i unrhyw un sy'n gweithio yn y maes gofal:

• Gosteg ac amynedd: Mae'r rhain yn hanfodol wrth ddelio â sefyllfaoedd emosiynol neu gymhleth.
• Gwytnwch a meddu ar wybodaeth ymarferol sy’n ystyriol o drawma: Deall effaith trawma ac ymateb gydag empathi a chryfder.
• Cyfathrebu effeithiol: Drwy fod yn wrandäwr da a drwy gyfathrebu'n glir â'r cydweithwyr a'r bobl rydych chi'n eu cefnogi.
• Ffiniau proffesiynol: Cynnal perthnasoedd parchus a phriodol, yn enwedig wrth weithio gyda phlant a phobl ifanc.

Uned un: Twf, Datblygiad a Llesiant Dynol – deall sut mae diwylliant a hunaniaeth yn dylanwadu ar ofal.

Uned dau: Iechyd a Gofal Cymdeithasol, ac Egwyddorion a Gwerthoedd Gofal Plant – canolbwyntio ar ddiogelu, deddfwriaeth a hawliau plant.

Uned dau: Egwyddorion gofal a gofal plant, gan gynnwys hyrwyddo annibyniaeth a dewis.

Uned dau: Gwerthoedd gofal, cyfathrebu, a ffiniau proffesiynol.

1. Sut mae taith Karolina yn dangos pwysigrwydd ymwybyddiaeth ddiwylliannol mewn lleoliadau iechyd a gofal cymdeithasol?
2. Pa ddeddfwriaeth a chyfrifoldebau diogelu y byddai angen i Karolina eu deall wrth weithio mewn cartref gofal preswyl i blant?
3. Pam mae dull sy'n canolbwyntio ar yr unigolyn yn bwysig wrth gynllunio ar gyfer dyfodol plant a phobl ifanc mewn gofal?
4. Pa sgiliau a rhinweddau personol y mae Karolina yn eu dangos sy'n hanfodol ar gyfer gweithio mewn gofal cymdeithasol? Sut mae'r rhain yn ymwneud ag ymarfer proffesiynol?