Diwrnod Gofal Gofalwn Cymru yn yr Eisteddfod Genedlaethol

Mae Gofalwn Cymru yn gyffrous i gyhoeddi y byddwn yn ôl am yr ail flwyddyn yn olynol yn noddi’r Eisteddfod Genedlaethol ar ddydd Mawrth 6 Awst gyda’n Diwrnod Gofal.

Unwaith eto, mewn partneriaeth â’r Eisteddfod, bydd Diwrnod Gofal yn dathlu ein siaradwyr Cymraeg ac yn gobeithio denu mwy o siaradwyr Cymraeg o bob lefel i ystyried gyrfa mewn gofal.

Gall y Gymraeg fod yn fwy na geiriau i rywun sy’n derbyn gofal. Darllenwch am rai o fanteision defnyddio’r Gymraeg yn y gwaith a darganfyddwch adnoddau hyfforddi i’ch helpu yma.

Bydd y Diwrnod Gofal, ar ddydd Mawrth 6 Awst yn ddiwrnod gwych gyda ffocws ar hybu’r Gymraeg yn y sector gofal. Dyma flas o’r hyn y gallwch ei ddisgwyl:

• bydd tîm Gofalwn Cymru a chydweithwyr o Ofal Cymdeithasol Cymru o gwmpas i siarad ac yn awyddus i gael eich barn ar bwysigrwydd y Gymraeg yn y sector gofal
• bydd y tîm Cyflwyniad i ofal cymdeithasol a Chyflwyniad i ofal plant yn o gwmpas i siarad a hyrwyddo ein cyrsiau hyfforddi am ddim
• am 12:30pm yn Ganolfan Ymwelwyr y Lido byddwn yn cyhoeddi enillydd Gwobr Gofalu trwy’r Gymraeg 2024
• am 3pm yn y Babell Cymdeithasu rydym yn cynnal digwyddiad ar y cyd ag Iechyd, Gofal a’r Gymraeg, Gofal Cymdeithasol Cymru a’r Coleg Cymraeg
• bydd Gofalwn Cymru yn cael ei gynrychioli ar stondin Cyngor Bwrdeistref Sirol Rhondda Cynon Taf yn y pentref

... a llawer mwy!

Mae Gwobr Gofalu trwy’r Gymraeg yn wobr flynyddol sy’n cydnabod, dathlu a rhannu gwaith y rhai sydd wedi gwneud gwahaniaeth gwirioneddol i fywydau pobl drwy ddarparu gofal a chymorth drwy gyfrwng y Gymraeg. Cynhelir y seremoni wobrwyo am 12.30pm yng Nghanolfan Ymwelwyr Lido. Eleni, mae pump yn y rownd derfynol:

Abbie Edwards, Rheolwr Cofrestredig, Haulfryn Care Limited yn Sir y Fflint

Elain Fflur Morris, Uwch Ofalwr, Cartref Bryn yr Eglwys yng Nghonwy

Leone Williams, Gweithiwr gofal cymdeithasol, Canolfan Adnoddau Cae Glas yn Rhondda Cynon Taf

Myfanwy Harman, Arweinydd, Cylch Meithrin y Gurnos ym Merthyr Tudful

Sian Jones, Rheolwr Busnes, Cartref Preswyl Dewi Sant yn Sir Ddinbych

Gallwch ddarllen mwy amdanynt a phleidleisio am eich enillydd yma

Diwrnod Chwarae yw’r diwrnod cenedlaethol ar gyfer chwarae, sy’n cael ei ddathlu bob blwyddyn ar y dydd Mercher cyntaf ym mis Awst ac eleni, mae Diwrnod Chwarae yn digwydd yn ystod wythnos yr Eisteddfod ar 7 Awst. Bydd amrywiaeth o weithgareddau ar gael i blant ym Mhentref Plant a byddwn yn paratoi ar gyfer y diwrnod mawr hefyd drwy dynnu sylw at rai o’r gwaith a’r cyfleoedd gwych y mae’r sector chwarae yn eu cynnig.

Os gallwch weld eich hun yn gweithio yn y sector chwarae, neu eisiau mwy o wybodaeth am y gwahanol rolau yn y sector chwarae yna ewch i Chwarae Cymru – yr elusen genedlaethol sy’n hyrwyddo chwarae plant. I ddathlu Diwrnod Chwarae maent yn hyrwyddo digwyddiadau sy’n digwydd ledled Cymru ar eu gwefan Plentyndod Chwareus Cymru a’u tudalen Facebook.