Astudiaethau achos ysgrifenedig Cymraeg
Sut mae ychydig bach o Gymraeg yn gallu gwneud gwahaniaeth mawr ym maes gofal cymdeithasol
O ofal personol, i gymorth gyda thasgau bob dydd, cynnal gweithgareddau neu gael sgwrs hyd yn oed, mae gweithwyr yn y sector gofal yn gwneud gwahaniaeth go iawn i fywydau’r bobl maen nhw’n gofalu amdanynt bob dydd.
A rhan fawr o gynnig gofal o safon yw sicrhau bod gan bawb gyfle i dderbyn gofal yn yr iaith y maen nhw’n teimlo fwyaf cyfforddus yn ei siarad.
P’un a ydych chi’n siaradwr Cymraeg rhugl neu’n siarad tipyn bach, bydd defnyddio unrhyw Gymraeg yn helpu i greu cysylltiadau agosach fel gweithiwr gofal, a gwneud gwahaniaeth positif i ofal cymdeithasol yng Nghymru.
I lawer o siaradwyr Cymraeg sy’n derbyn gofal, mae gallu siarad yn eu mamiaith yn hanfodol i’w lles. Bydd llawer o bobl hŷn yn troi nôl at yr iaith sydd fwyaf cyfarwydd iddynt wrth i’r blynyddoedd fynd yn eu blaenau, ac mae’n bosibl mai dim ond yn eu hiaith gyntaf y bydd pobl â chyflyrau fel demensia yn gallu mynegi eu hunain.
Mae siarad â rhywun yn eu hiaith gyntaf yn creu cysylltiad go iawn. Mae’n fwy na geiriau.
Mae cartref gofal Glan Rhos yn Ynys Môn yn credu’n gryf bod defnyddio’r Gymraeg wrth ofalu – o Gymraeg sylfaenol i rugl – yn hanfodol i’r gwasanaeth sydd ar gael i’w breswylwyr. Cawsom glywed yn uniongyrchol gan bobl wahanol yn y cartref am eu safbwyntiau.
